En ocajiun dla “Trienala Ladina 2026”, vëgn cin’ artistes y artisć inviá a se confronté cun la tematica ampla dl ecosistem musical dles valades ladines, n raiun daldötnenia periferich, sciöche an podess miné. L’obietif dla “Trienala” sará la creaziun de operes inedites che documentëia y mët en mostra la comunité da munt esploran conzec sciöche les desfides de na sozieté iper-coliada, la cura dl ambiënt y dla contrada incëria y le rode dla musiga y dl cianté sciöche elemënt che tëgn adöm la comunité.
I inoms cernüs fora danter i 40 partezipanc al concurs che podará spo mëte fora sües operes tla mostra coletiva “Trienala Ladina 2026”, programada dai 22 de ma cina ai 27 de setëmber 2026 tl Museum Ladin Ciastel de Tor, é indöt cinch.
Ara se trata de Isabell Pitscheider (Gherdëna), Ernestina Abbühl (Grijuns), Barbara Tavella (Val Badia), Tobias Tavella y dl duo Youlee Ku y Fabian Feichter (Val Badia). Le tema y la responsabilité dla curataziun é tles mans de Andrea Lerda, storich dl’ert y curadú dl Museo Nazionale della Montagna de Torino, olache al é responsabl dl program de sostignibilité y di proiec d’ert contemporana.
Arnold Holzknecht é gnü chirí fora por le “Pest de scoltöra artistica Richard Agreiter”. “Por mirit de süa facolté – insciö la motivaziun dla iuria – de fá jí adöm cun sensibilité y cualité la tradiziun dla scoltöra tl lëgn, inraijada sot tl monn ladin, cun n’armonia y na reflesciun coerënta söla contemporaneité, y che le condüj ala ibridaziun, formala y conzetuala, de materiai, tematiches y pratiches.” La scoltöra chirida fora dala iuria gnará cumprada dal Museum Ladin.
La 8ª “Trienala Ladina” é n concurs resservé a dötes les artistes y a düc i artisć residënc tles cin’ valades ladines, ti Grijuns y tl Friul y daverta a de vigni sort de formes y espresciuns artistiches.
Le “Pest artistich de scoltöra Richard Agreiter”, destiné a artistes y artisć dl Tirol storich y dles valades ladines de Badia, Gherdëna, Fascia, Fodom y Ampëz, vëgn scrit fora dal Museum Ladin Ciastel de Tor y finanzié dal artist austriach Richard Agreiter che á sües raisc tla Val Badia.