Vigni 3 agn organisëia le Museum Ladin Ciastel de Tor le concurs artistich Trienala Ladina; chëra dl 2026 é la 8. ediziun. Tó pert pó artistes y artisć residënc tles 5 valades ladines Badia, Gherdëna, Fascia, Fodom y Ampëz, tl Ciantun di Grijuns tla Svizera y tl Friul. Al pó ince tó pert porsones creatives che se sënt ladines y che á n lian cun la storia, la cultura y les tradiziuns ladines. Al pó tó pert al concurs ince i davagnadus y les davagnadësses dles ediziuns da denant.
En ocajiun dla Trienala Ladina 2026 vëgnel invié cin’ artistes y artisć a se confronté cun l’ecosistem musical ampl dles valades ladines.
Le curadú dla Trienala Ladina 2026 é Andrea Lerda (Cuneo, 1983), storich dl’ert y curadú. Dal 2018 laorel tl “Museo Nazionale della Montagna” de Torino, olache al cura le “Programma Sostenibilità” y i proiec d’ert contemporanea.
Les categories conzedüdes é: illustraziun, dessëgn, pitöra, grafica, digital art, performance, sound art, fotografia, scoltöra. Al vëgn tut ite ince categories d’ert nia nominades te na manira esplizita. Na comisciun internazionala chiriará fora cina cin’ artistes y artisć che ará la poscibilité da fá n’opera d’ert nöia o da mëte en mostra n’opera bele esistënta, tan inant ch’al vëgn tigní ite le conzet. La mostra coletiva sará da odëi dai 22 de ma cina ai 27 de setëmber 2026 tl Museum Ladin.
Concurs de scoltöra
Le Museum organisëia en colaboraziun cun l’artist Richard Agreiter ince n concurs por la cumpra de scoltöres. Tó pert pó scolturies y scolturs che vir y laora tl raiun dl’Euregio cun Tirol Sudtirol y Trënt, sciöche ince ti trëi comuns de Fodom, Cortina y Col y che á n lian particolar cun la cultura, la storia y les tradiziuns ladines. Les scoltöres chirides fora dala comisciun gnará cumprades dal Museum Ladin.
La documentaziun por trami concursc mëss gní dada jö, menada por e-mail o ortiada por posta al Museum Ladin Ciastel de Tor, Str. Tor 65, 39030 San Martin de Tor, y rové a destinaziun anter i 02 de forá 2026. Da mëte averda: la data dl timber dla posta ne vel nia!