Filigrana

Tl workshop “FILIGRANA” ves vëgnel splighé le monn afascinant dla filigrana, na tecnica secolara che vëgn ince ciamó aldedanicö adorada por la creaziun de toc de belejia d’arjënt. L’ert dla filigrana cun arjënt é n mistier dl artejanat artistich significatif por les valades ladines, pratiché en particolar a Cortina d’Ampëz, dala fin dl XIIXejim secul inant. L’imitaziun estremamënter fedela  de ciüfs sciöche la stëra de munt, les anemones y confolies decorâ y decorëia ciamó incö spanges, prosc y cioi de trohtes tradizionales.

Liana Scarano mostra ci sort de massaries y ci fertrac d‘arjënt che vëgn tuc tla filigrana y spliga avisa les tecniches desvalies che an adora da realisé chisc ogec d’ornamënt tan bi y tan fins. Tres süa desmostraziun imparon da conësce les tecniches de laur desvalies y an pó ciaré pro sciöche les pices operes d’ert ciafa bel plan forma y ci prezijiun y ci förtl artistich che al é doía.

Te chësc workshop ne imparon nia ma la basa dl’ert da belijier, mo an á ince la poscibilité da porvé fora instësc les tecniches dla filigrana. Cun massaries desvalies sciöche tenaies, zanges, limes y d’atri stromënc imparon da cherié sü toc de belijia daldöt personalisá. An ciafa la poscibilité da podëi pié ite instësc te chësc laur artistich y da trasformé sües idees te toc de belijia d’arjënt.