Prejentaziun dl liber: Ingrid Runggaldier – Gezahnt wie der Kiefer eines Alligators

Da dedoravia semiova la Dolomites giut alalongia tan che mpuscibles da arjonjer. L ne ie perchël nia da se fé marueia che al editëur de libri de viac John Murray ti recurdoveles i dënz tl gramblin de n aligatëur. I prim viagiadëures fova faszinei y emoziunei dala gran marueia!
Te si liber “Gezahnt wie der Kiefer eines Alligators. Was Reisende über die Dolomiten schrieben” à Ingrid Runggaldier purtà adum estrac de tesć ora dla opres dla leteratura mundiela, relazions de viac, lëtres, diares che lascia inò reviver l spirt de descurida da ntlëuta.
Te na cunversazion cun Elide Mussner conta l’autora de si nrescides y scuviertes n cont dla biografies di truep/dla truepa autores che à esplurà la Dolomites. Tres la letura de na selezion de tesć ancuntons na lingia de pionieres dl viac tla Dolomites sciche p.ej. Josiah Gilbert y George C. Churchill, Amelia Edwards o Karl Baedeker y alpinisć sciche Emil Zsigmondy, Leone Sinigaglia o una dla prima espunëntes dl alpinism feminil modern, Jeanne Immink.

Ingrid Runggaldier ie tradutëura y se à ti ani dat ju cun lingac y leteratures tl cunfront, cun studesc sun la storia dl’ëiles, de gënder y dla mendranzes ma dantaldut nce cun la storia dl alpinism y dl turism. Pra l editëur Raetia ie oradechël unì ora si liber “Frauen im Aufstieg. Auf Spurensuche in der Alpingeschichte” (2011).

La manifestazion é metuda a jì deberieda dal Museum ladin y dal Cunsëi de furmazion de Badia.