Dan zirca 252 miliuns de agn gaujâ de grandiscimes eruziuns vulcaniches tla Siberia na catastrofa climatica che á porté a na estinziun de massa. I corëc dles formaziuns Bellerophon y Werfen testemoniëia la diversité imprescionanta dan l’eruziun y la monotonia gnüda a se cherié dedô.
I vijitadus pó odëi sciöche i ecosistems dl mer á reagí a condiziuns estremes y ci conseguënzes che la relasciada de anidrida de carbonium da pert dl Trapp Siberian á albü. L’esposiziun mostra sciöche la vita á spo indô bel plan metü man y coche organisms sciöche la concora Claraia á imparé da se ausé a ambiënc cialc y armangorusc de ossigen. Le fat che l’umanité sciüra incö fora plü anidrida de carbonium co i vulcans siberians ai tëmps dl’estinziun de massa nes dess dé dassënn da ponsé.
N focus particolar i vëgnel dediché tla mostra ales repercusciuns di mudamënc climatics tl Südtirol: l’aumënt dles temperatöres, la delegada di dlacias y le limit dles novüdes tres plü alalt, desmostra ci influs che nosc comportamënt á söla biodiversité y söla resiliënza dl ambiënt y ci contribut che vignun de nos pó dé por smendrí les emisciuns y promöie n dagní plü sostignibl.
Tres n colian danter presënt y passé pîta la mostra n segnal d’alarm y nes dij che al é gran ora da pié a man valch y sotrissëia le debojëgn de sforc globai por evité les plü burtes conseguënzes dl mudamënt climatich.
> da desćiarié – high quality: Catalogh – Countdown to Mass Extinction?
> da desćiarié – low quality: Catalogh – Countdown to Mass Extinction?
