N iade da süd a nord, dala Val Badia cina al’isola Sylt tl mer dl nord. Chësc é ci che vijitadësses y vijitadus pó odëi tla mostra “Siegward Sprotte – Nord süd, la geografia dl’ert”, che vëgn presentada tla tor medievala dl Museum Ladin Ciastel de Tor, 20 agn dô la mort dl’artist Siegward Sprotte (1913-2004). Le lian danter l’artist todësch y la Val Badia á metü man tl 1936, canche Sprotte é rové plülere por caje a Calfosch, olache al é spo gnü inant ann por ann. Le comun de San Martin de Tor ti á surandé la zitadinanza d’onur tl 2003, le Museum Ladin ti á dediché en chë ocajiun cun la mostra y á deplü operes te süa coleziun che l’artist ti á surandé tratan süa vita.
“Nord y süd. Crëp y mer. Corú y forma. Chisc é contrasć che Sprotte mostra te so laur artistich y lascia dialoghé danter ëi cun gran naturalëza.” Insciö descrii le curadú dla mostra Phil Mer les tematiches presëntes tla mostra. Cun chësc spliga Sprotte, che n’ó nia gní definí n sciöche n artist de paesaji y contrades, ch’al ne porta nia sön papier ci che sü edli vëiga. Chësc pónpor ejëmpl osservé tl fat che al ne depenjô nia en plein air les contrades ch’al â incëria. Canche al ê a Sylt tla Germania depenjôl les munts, y al contrar depenjôl le mer canch’al ê tla Val. “Chësc é tipich por n artist cun gran esperiënza. Ci ch’al vëiga y tol sö vëgn interiorié dal artist, por podëi spo le revoché y rapresenté te süa ert” spliga Phil Mer. Y atramënter che an le conësc dala teoria dla storia dl’ert, olache i corusc de n artist o n’artista devënta plü cialc dô n iade tl süd, devënta pro Siegward Sprotte la paleta di corusc plü ressoluta. Al depënj nord cun tons cialc y le süd paradossalmënter cun tons plü frëic.
Ince la tor medievala dl ciastel á n nord y n süd: dui salamënc despartis. N salamënt al süd cun chedri de lëgns, moiüs dal vënt y curís dala nëi. Y spo n salamënt al nord cun la isola de Sylt cun chedri che mostra le mêr y ones en movimënt.
La mostra pó gní vijitada cina la fin de setëmber.