Cristinarosa Pizzinini
(San Ciascian, 1959) á
do na formaziun tla grafica de reclam a Milan
fat na inrescida artistica liada al readoramënt/
reziclaje por la revitalisaziun di materiai. Cun
le proiet LÖM trasformëiera bozes PET y d‘atri
elemënc de plastica te löms, ciandeliers y
ogec lominusc. Tres löm y trasparënza ti dá
l‘artist indô valüta a ci che vëgn sciuré demez,
trasforman le refodam te materia creativa.
„Mi travert é chël da ilominé n material
scëmpl, che gniss zënza sciuré demez,
y da ti dé löm a n’infinité de poscibilités
creatives cun le reziclé.˝
Georg Erlacher
(Balsan, 1969) vir y laora a Al Plan
de Mareo sciöche fotograf y restauradú.
Süa inrescida esplorëia le raport danter
natöra, contrada y memoria. Cun na odlada
essenziala y contemplativa inrëscel la löm y
le microcosmos natural, trasforman detais de
plantes, insec y tiers te formes feter astrates.
Sües fotografies respidlëia la fragilité di
ecosistems y le raport danter porsona y natöra
y inviëia da osservé le monn cun plü atenziun y
morvëia.
˝Löm é döt ci co stá danter
le fosch y le blanch.
Löm é movimont.
Ci che i nen fajun denfora stá a nos.˝
Albert Mellauner
(Rina, 1947) á arjunt le diplom de
Maester d‘Ert a Urtijëi y le Magister d‘Ert sides
a Aunejia co spo ince a Firenze. Süa inrescida
artistica se svilupëia tl cheder dl astratism
geometrich, olache al tol ispiraziun dales
esperiënzes dl‘avanguardia europeica. Tratan
süa ativité ál realisé cotan de laurs publics
profans y sacrai tla Val Badia y te döt Südtirol,
danter l’ater le vider dl foyer dla sënta dla Junta
provinziala da Balsan y la pitöra söla falzada dla
dlijia Regina Pacis a Balsan.
˝Löm é aria, le corú adora aria,
la mort é aria.˝
